KAMATI YA UCHAGUZI WA MAJI MAJI FC KUKAA LEO KUJADILI MCHAKATO WA UCHAGUZI!!

Na Baraka Mpenja

Wanalizombe Maji Maji FC ya Songea mkoani Ruvuma wanatarajiwa kufanya uchaguzi wa viongozi mwezi ujao ili kuendeleza gurudumu la kuirudisha timu hiyo soka la ushindani zaidi.

Mwenyekiti wa kamati ya uchaguzi Joseph Mapunda amesema leo hii kamati yake iliyochaguliwa kuhalali na viongozi wa timu hiyo wanakaa kikao ili kujadili ni lini zoezi la uchukuaji wa fomu litaanza, usaili wa wagombea na siku ya kufanya uchaguzi.

 “Nafurahi sana kuongea na watu wa Mtandao wa MATUKIO DUNIANI, ninapenda kutumia nafasi hii adimu kuwataarifu kuwa mchakato wa uchaguzi unakwenda sawasawa na leo hii majira ya jioni tutatoa utaratibu mzima”. Alisema Mapunda.

 Mapunda alizitaja nafasi saba kuwa ndio zitawaniwa na wanachama halali wa klabu hiyo.

 “Kuna nafasi mbili za juu, mwenyekiti na makamu mwenyekiti pamoja na nafasi za wajumbe watano wa bodi ya timu, nadhani watapatikana mwezi ujao kama mambo yatakuwa mazuri”. Alisema Mapunda.

 Pia mwenyekiti huyo alisema mchakato wa uchaguzi utazingatia haki sawa kwa wote, hakuna mgombea atakayeonewa.

“Kwa uzoefu wangu wa kusimamia uchaguzi, sina wasiwasi kabisa kama kuna ujanja ujanja utafanyika, watapita wenye sifa zinazotakiwa, nataka wanachama wa Maji Maji watambue kuwa tupo kwa ajili ya kuendeleza klabu yetu nzuri”. Alisema Mapunda.

 Mapunda alisema wanawakaribisha watu wote kuomba nafasi za uongozi katika klabu yao, hata kama mtu ni mwenyeji wa Ruvuma halafu anaishi nje ya mkoa wa Ruvuma anakaribishwa sana kuomba nafasi.

Pia aliwataka wanachama wa klabu hiyo kuwa makini wakati huu wa kutafuta viongozi wa kuiongoza klabu yao,  kwani kama watafanya makosa basi wataendelea kuirudisha  nyuma.