CHEKA AWASHUKIA WADHAMINI WA MICHEZO, AWATAKA WAACHE UBAGUZI!!

Na Baraka Mpenja

Bingwa wa IBF Afrika, bondia asiye na mpinzani kwa sasa nchini Tanzania , mwenye makazi yake Mkoani Morogoro, Francis Cheka ameibuka na kudai kuwa mchezo wa masumbwi haupewi kipaumbele na wadhamini wa michezo kama ilivyo kwa soka.

Cheka akiwa mkoani Morogoro, mji kasoro bahari ameiambia MATUKIO DUNIANI kuwa serikali ya Tanzania na wadau wa michezo kwa ujumla wameutupa sana mchezo wa ndonga ambao unafanya vizuri medani ya kimataifa.

“Unajua mimi nashangaa sana, tukienda kushindana kimataifa huwa tunaimba wimbo wa taifa kuashiria kuiwakilisha nchi, lakini hatupewi kitu na viongozi wetu na tunabaki kuhangaika tu”. Alisema Cheka.

Cheka aliongeza kuwa kwa sasa kila kampuni inakodoloa macho kudhamini kandanda lakini hata kidogo hawajitokezi kudhamini masumbwi na kumwaga pesa nzuri kwa mabondia ambao kila siku wanateseka na ukata katika maandalizi yao.

Bondia huyo mwenye uwezo mkubwa wa kucheza masumbwi akiwa ulingoni alisisitiza kuwa kila mchezo unahitaji mipango, fedha na uwezeshaji.

“Mimi nawaeleza viongozi kitu kimoja, lazima wabadilike, natamani siku moja nionane na Mheshimiwa Rais Dkt. Kikwete nimueleze jinsi tunavyohenyeka katika mchezo huu ambao tukienda kimataifa tunaimba wimbo wa Taifa”. Aliongea Cheka kwa hisia.

Cheka alitolea mfano michuano ya Olmpic kuwa Taifa linawakilishwa na wabondia wachache wakati serikali inaweza kusafirisha mabondi hata mia moja kwenda kushiriki.

“Nia ya kuendeleleza masumbwi imekufa kabisa, cha msimgi lazima viongozi wetu wabadilike sana”. Alisisitiza Cheka.

Akizungumzia suala la kuanzisha kituo cha kulea na kuibua vipaji vya mabondia wachanga, Cheka alisema mpango huo upo lakini peke yake bado ni ndoto kutokana na kukosa wadhamini.

 “Mimi Cheka nikisema najenga kituo cha kuchukua hata wanafunzi 50 ni uongo, sina uwezo huo, lakini serikali inao uwezo wa kujenga kituo cha kuchukua hata wanafunzi 1000 kwa mwaka, ila wamekosa nia tu”. Alisema Cheka.

Siku ya mei mosi Cheka alitetea ubingwa wake wa IBF Africa na kutwaa zawadi ya gari aina ya Noah baada ya kumtwanga Simba asiyefugika Thomas Mashali katika ukumbi wa PTA jijini Dar es salaam.

Ushindi huo ilimfanya Cheka kuendeleza ubabe kwa mabondia wa Tanzania na Afrika baada ya kutwaa ubingwa huo kwa mara ya pili mfululizo.