“BUKU TANO TU” KUSHUHUDIA KIMBEMBE CHA WATANI WA JADI, WENYE PESA ZAO 30,000/= UWANJA WA TAIFA!!

 

Mazoezi ya Mnyama Simba sports Club, “Taifa Kubwa” visiwani Zanzibar kujiandaa na mechi ya watani wa jadi jumamosi uwanja wa taifa Dar es salaam  

Kwa Lalalumpa Malysia, Dar Young Africans wakijifua visiwani Zanzibar kujiandaa kufuta fedheha ya mabao 5-0 jumamosi ya wiki hii uwanja wa taifa

Na Baraka Mpenja

Wakati joto la pambano la watani wa jadi Jumamosi katika uwanja wa taifa majira ya saa 10 jioni likizidi kushika kasi zaidi katika viunga vya Dar es salaam na maeneo yote ya Tanzania, tayari shirikisho la soka Tanzania TFF limetangaza viingilio vya mchezo huo wa kufunga pazia la ligi kuu Tanzania bara.

Mashabiki watalipa  Sh. 5,000 kwa lugha ya mitaani “Buku Tano”  kikiwa kiingilio cha chini zaidi katika sehemu ya viti vya Rangi ya Bluu. 

Viti vya rangi ya kijani itakuwa sh. Elfu saba (7000/=),  wakati viti vya rangi ya chunga itakuwa sh. Elfu kumi (1000).

Kwa wale wenye pesa zao viingilio vitakuwa ni Sh. 15,000 kwa VIP C, Sh. 20,000 kwa VIP B na Sh. 30,000 kwa VIP A.

Ofisa Habari wa Shirikisho la Soka Tanzania (TFF), Boniface Wambura Mgoyo alisema kuwa viingilio hivyo ni sawa na viingilio vya mchezo wa mzunguko wa kwanza wa ligi hiyo baina ya klabu hizo  Oktoba 3 mwaka jana ambapo zilitoka sare ya 1-1. 

Wambura alisema tiketi zitaanza kuuzwa siku moja kabla ya mchezo, yaani Ijumaa wiki hii katika vituo mbalimbali vitakavyotajwa.

Pia aliwataka mashabiki wa soka kujitokeza kwa wingi kutazama mechi hiyo yenye mvuto wa aina yake huku akiwatahadharisha na uwepo wa tiketi bandia hivyo wanunue tiketi katika vituo husika.

Tayari miamba yote miwili ya soka la Tanzania ipo mafichoni visiwani Zanzibar sehemu tofuati kujiwinda na mtanange huo.

Kwa nyakati tofauti makocha na viongozi wa timu hizo pamoja na mashabiki wamekuwa wakitambiana huku kila mmoja akijiamini kuwa lazima apate ushindi.

Yanga wanakumbuka kipigo cha 5-0 msimu wa mwaka jana na kinawazunguka zaidi vichwani na wanahitaji kulipa kisasi msimu huu ambapo tayari ni mabingwa, wakati Simba wana hasira ya kupoteza nafasi ya ubingwa na mshindi wa pili msimu huu.

Simba kwa sasa inawatumia vijana zaidi wakati Yanga inawatumia mafaza wote na vijana wake.

Tusubiri nini kitatokea siku ya jumamosi uwanja taifa jijini Dar es salaam, majira ya saa kumi kamili jioni kwa saa za Afrika Mshariki.

Yanga wameweka kambi yao kisiwani Pemba katika hoteli ya Samail mkabala na benki ya PBZ, wakifanya mazoezi Uwanja wa Gombani wakati Simba wameweka kambi maeneo ya Mbweni JKT Zanzibar wakifanya mazoezi kwenye Uwanja wa Mao Dze Tung.