BI. SARA AELEZA KWANINI WANAWAKE HAWAENDESHI TAASISI ZA MICHEZO NCHINI!!

Bi Sara Ramadhan akizungumza katika moja ya mkutano wake na waandishi wa habari

Na Baraka Mpenja

Kuwepo kwa mfumo dume, kukosa nia ya uthubutu, mazingira ya rushwa na kutojali soka la wanawake imeelezwa kuwa ndio sababu kubwa ya wanawake wengi nchini Tanzania kutoshirikia katika michezo kwa maana ya kucheza na kuongoza taasisi za michezo mfano TFF.

Hayo yameelezwa na aliyewahi kuwa makamu wa mwenyekiti wa chama cha riadha Tanzania (RT) miaka ya 1976, mjumbe wa kamati ya wanawake na Uchaguzi ya TFF, na sasa mjumbe wa kamati ya utendaji ya klabu yaYanga ya Dar es salaam, Bi. Sara Ramadhan katika mahojiano maalumu na mtandao wa MATUKIO DUNIANI.

Bi. Sara amesema wanawake wanapolundikiwa majukumu ya nyumbani kama kufua, kupika, kulea watoto n.k Kumesababisha wengi kutoshiriki katika michezo kwa maana ya kucheza na kujihusisha na mambo ya kuongoza michezo.

Mdau huyo wa soka aliongeza kuwa mbali na mfumo wa kumtumikisha mwanamke katika majukumu mengi ya kifamilia, pia mazingira ya rushwa katika chaguzi mbalimbali imekuwa tatizo kubwa kwa wanawake kupata nafasi za uongozi katika taasisi za soka nchini.

“Unajua katika chaguzi nyingi kuna matumizi ya pesa nyingi ambazo ni rushwa kwa namna moja ama nyingine, kiukweli ni ngumu sana kwa mwanamke kumwaga pesa ili achaguliwe, mara zote anawaza kuwalea watoto wake, mume wake na ndugu zake wa nyumbani, na ndio maana kupata nafasi za juu imekuwa ngumu sana”. Alisema Bi Sara.

Sara alisisitiza kuwa imekuwa ngumu sana kwa wanawake kuaminiwa na kupewa nafasi za juu katika taasisi za soka na hivyo kushindwa kuwahamasisha wanawake wengine kuingia katika mipango ya kuendeleza soka la Tanzania.

Mbali na tatizo hilo, Sara aliendelea kueleza kuwa wanawake wamejiweka mbali sana na masuala ya michezo kutokana na kukosa nia ya uthubutu.

“Wanawake wengi hawaamini kama wanaweza, na ndio maana katika chaguzi nyingi hawajitokeza, lakini kwangu mimi hata TFF fomu za kuomba nafasi nitajaza kwasababu najiamini sana”. Alisema Bi Sara.

Akizungumzia suala la soka la wanawake, Bi Sara alisema TFF imeshindwa kuwekeza katika soka hilo na ndio maana hakuna ligi za soka kwa wanawake katika mikoa ukiachana na Dar es salaam.

“Leo hii unaibuka na kusema unataka kuendeleza soka la wanawake, jamani unaanzia wapi?, hakuna ligi wala nini, hakika ni ngumu sana kufikia malengo yetu”. Alisema Bi Sara.

Bi Sara alipoulizwa kama soka letu linaendelea tofauti na miaka ya nyuma, alisema yeye anaenda tofauti na watu wengi wanaodhani soka letu linaendelea.

“Huwezi kusema soka linakua kama huwekezi soka la vijana, nani anajua jinsi timu ya taifa inavyochaguliwa?, kwanini Yanga, Simba na Azam?, hakuna mchakato wa kuzunguka mikoani kutafuta vipaji vipya, kwa hali hii tutabaki kujiona tunaendelea kumbe tuko palepale”. Alisema Bi Sara.

Aidha Bi Sara alishauri kuwa ni lazima kila mkoa uwe na vituo vya soka la vijana kuanzia saba au nane ambavyo vinasaidiwa na TFF kupata vifaa vya michezo na kutumika kama vitalu vya kupata timu za vijana za taifa na timu ya wakubwa kama ilivyo kwa nchi za wenzetu.