BEKI KISIKI WA JKT RUVU AJIPIGIA DEBE KWA SIMBA NA YANGA, KAZI NI KWAO SASA!!

Na Baraka Mpenaja

 Wakati timu za ligi kuu Tanzania bara zikiangaza darubini zao kusaka wachezaji wapya wa kuwasili kwa ajili ya msimu ujao wa  ligi kuu Tanzania bara, mlinzi wa kushoto wa klabu ya maafande wa jeshi la kujenga taifa JKT Ruvu ya mkoani Pwani Stanley Nkomola amejipigia debe kwa klabu za Simba na Yanga akitaka zimsajili kwa msimu ujao wa ligi.

 Nkomola ameiambia MATUKIO DUNIANI kuwa kama timu hizo zinataka kumsajili kwa dau nono yupo tayari kuachana na wapiga kwata hao wanaonolewa na kocha mkongwe Keny Mwaisabula “Mzazi”.

 “Natamani kufika mbali zaidi kisoka, nataka kucheza kimataifa, nafikiri Simba na Yanga ni timu nzuri sana, zinaweza kunifikisha ninapotaka”. Alisema Nkomola.

 Alipoulizwa kama ataweza kuhimili ushindani wa namba katika klabu hizo, Nkomola alijigamba na kusema kuwa Tanzania ya sasa hakuna beki bora wa kushoto kama yeye.

 “Hakuna mwalimu anayeweza kumnyima nafasi mchezaji anayecheza vizuri, najiamini sana, naweza kushindana katika klabu yoyote hapa Tanzania na kucheza kikosi cha kwanza muda wote”. Alisema Nkomola.

 Beki huyo kisiki alisema kama hatapata timu kubwa kwa sasa ataendelea kuitumikia klabu yake ya sasa kwa msimu ujao wa ligi.

 “Nafurahi sana kucheza JKT Ruvu kwa sasa, timu ina morali kubwa na wachezaji wazuri, lakini soka ni ajira kwa sasa, kama Simba na Yanga watanihitaji sioni tatizo kujiunga na timu hizo zenye majina makubwa nchini Tanzania”. Alisema Nkomola.

 Akizungumzia jinsi walivyomaliza ligi, Nkomola alisema walicheza kwa morali kubwa mechi za lala salama ili kukwepa mkasi wa kushuka daraja, na kama wangezembea wangekwenda na maji.

 “Timu ilijengwa vizuri sana dakika za mwisho, kocha mpya Mwaisabula alitutaka kucheza kwa lengo la kubakia ligi kuu ili tujipange vizuri msimu ujao, tulijitahidi sana kuhakikisha tunafanya kama alivyotuagiza na kufanikisha ndoto zetu, sasa tunakuja msimu ujao kwa kasi kubwa”. Alisisitiza Nkomola.