AZAM KUSAKA POINTI MOJA MBELE YA MGAMBO KUTETEA NAFASI YAKE YA UMAKAMU BINGWA!!

Na Baraka Mpenja

Wana lambalamba, Azam fc yenye makazi yake Mbande Chamazi nje kidogo ya jijini la Dar es salaam wamesema maandalizi kwa ajili ya mchezo wa kesho katika uwanja wa taifa dhidi ya Mgambo shooting ya Tanga yamekamilika na wapo tayari kusaka pointi tatu muhimu ili kutetea umakamu bingwa wao walioutwaa msimu uliopita.

Mechi ya Azam dhidi ya Mgambo Shooting itachezeshwa na refa Jacob Adongo kutoka Mara, na atasaidiwa na Abdallah Rashid wa Pwani na Charles Mbilinyi wa Mwanza. Mwamuzi wa mezani atakuwa Idd Lila wa Dar es Salaam wakati Kamishna ni Omari Walii wa Arusha.

Akizungumza kwa njia ya Simu na mtandao wa MATUKIO DUNIANI kutoka Dar es salaam, Afisa habari wa klabu hiyo Jafar Idd Maganga amesema kikosi kipo salama na wanamshukuru mungu kwa kuwajalia afya na wanaendelea kumuomba ili awafikishe salama hapo kesho.

“Kila kitu kipo tayari, maandalizi yamekamilika, wachezaji wana morali kubwa na wameandaliwa vizuri na jopo la ufundi chini ya kocha wetu Muingereza Stewart John Hall”. Alisema Jafar.

Jafar alisisitiza kuwa japokuwa ushindani ni mkubwa sana kusaka nafasi ya pili hasa baada ya waliokuwa mabingwa wa ligi hiyo msimu uliopita, wekundu wa Msimbazi Simba kufanya vizuri na kuwapumulia kwa karibu hivi sasa.

“Sisi tunataka kuliwakilisha tena taifa kwa mara nyingine katika michuano ya shirikisho na kufika mbali zaidi ya mwaka huu ambao tumetolewa raundi ya tatu, hivyo nafasi ya pili kwetu ni muhimu sana na tunajipanga kushinda kesho ili kujiweka mazingirza ya uhakika”. Alisisitiza Jafar.

 Azam yenye pointi 48 inahitaji pointi moja zaidi ili kutetea nafasi ya pili kwa mara nyingine.

 Wakati Azam ikisaka pointi hiyo moja, Mgambo Shooting inayofundishwa na wachezaji wa zamani wa mabingwa wa Tanzania Bara mwaka 1988, Mohamed Kampira akisaidiwa na Joseph Lazaro ni moja ya timu ziko katika hatari ya kurudi Ligi Daraja la Kwanza (FDL) msimu ujao.

 Mgambo Shooting inahitaji pointi moja tu katika mechi mbili ilizobakiza kukwepa kurudi FDL, ikishindwa kupata pointi hiyo huku Polisi Morogoro na Toto Africans ya Mwanza zikishinda mechi zao za mwisho kwa uwiano mzuri wa mabao itakuwa imekwenda na maji.