VINARA YANGA KUWAKARIBISHA MAAFANDE WA JKT RUVU UWANJA WA TAIFA DAR ES SALAAM!!!

YANGA

Na Baraka Mpenja

Ligi kuu Tanzania bara kuendelea kesho kwa mchezo mmoja kupigwa katika dimba la taifa lenye nyasi nzuri baina ya vinara Dar Young Africans dhidi ya wapiga gwaridi wa JKT Ruvu kutoka mkoani Pwani.

Yanga yenye pointi 53 itashuka uwanjani kuhitaji pointi tatu muhimu baada ya kubanwa mbavu mchezo uliopita na maafande wa Mgambo JKT kwa kutoka nao sare ya 1-1 katika uwanja wa CCM Mkwakwani Mkoani Tanga.

Kuelekea katika mchezo huo wa kesho Yanga kupitia kwa afisa habar wake Baraka Kizuguto walisema maandalizi yamekamili na wachezaji wote wapo salama kambini kinachosubiriwa ni muda mwafaka kuwadia.

“Mchezo dhidi ya Mgambo waamuzi walichezesha madudu, waliwabeba wapinzani wetu na ndio maana tulishindwa kutwaa pointi tatu, tumerejea uwanja wa nyumbani tukiwa kikosi kamili, JKT Ruvu wataoneshwa soka safi na la kuvutia”. Alisema Kizuguto.

Afisa habari huyo aliongeza kuwa wanawashukuru mashabiki wao kuendelea kuwapa sapoti kubwa na amewaomba kujitokeza kwa wingi uwanja wa taifa hapo kesho kuwashangilia ili waibuke kidedea.

JKT Ruvu wanahitaji ushindi ili kuendelea na harakati zao za kujinusuru kushuka daraja msimu huu.

Kesho kivutio kwa mashabiki wa soka ni kumwona tena nyota wa zamani wa simba ambaye ana historia ya kuwafunga Yanga, Musa Hassan Mgosi ambaye sasa anakipiga katika klabu ya JKT Ruvu.

Mgosi kesho uatajaribu kuwafung Vinara yanga akiwa na timu tofauti na wapinzani wa karibu wa Yanga.

Mbali ya mechi hiyo, nyingine zitakazochezwa mwezi huu ni kati ya African Lyon na JKT Ruvu itakayofanyika Aprili 24 kwenye Uwanja wa Chamazi, Dar es Salaam wakati Aprili 25 ni kati ya Ruvu Shooting na Simba kwenye Uwanja wa Taifa, Dar es Salaam.

Nayo Coastal Union itaikaribisha Azam kwenye Uwanja wa Mkwakwani jijini Tanga katika mechi itakayochezwa Aprili 27. Uwanja wa Taifa utakuwa mwenyeji wa mechi kati ya Simba na Polisi Morogoro itakayofanyika Aprili 28.