VINARA YANGA KAMBINI KESHO KUWAWINDA WAPIGA KWATA JKT OLJORO!

Na Baraka Mpenja wa fullshangwe Dar es Salaam.

Baada ya mapumziko wa sikuu ya Pasaka, vinara wa ligi kuu soka Tanzania bara, klabu ya Dar Young Africans maarufu kama “Wazee wa Uturuki” kesho wanaingia kambini kujiandaa na mchezo ujao wa aprili 10 mwaka huu dhidi ya wapiga gwaride wa JKT Oljoro dimba maridhawa la taifa chang`ombe jijini Dar es Salaam.

Akiongea Kwa tambo nyingi, afisa habari wa klabu hiyo, Baraka Kizuguto, amesema hakuna wa kutwaa taji la ligi kuu msimu huu zaidi ya Yanga wenye pointi 49 kileleni wakifuatia na wawakilishi pekee wa Tanzania mashindano ya kimataifa, wana lambalamba  Azam fc waliopo nafasi ya pili wakiwa na pointi 43.

“Kesho tunaanza mawindo yetu dhidi ya Oljoro,  kikubwa mashabiki wetu waje kwa wingi siku ya mechi kama walivyofanya Morogoro kwani vijana wao wenye uchu wa kutwaa mwari msimu huu hawatawaangusha siku hiyo”. Alitamba Kizuguto.

Kizuguto alisema walifanya mikakati mikubwa ikiwa ni pamoja na kwenda kuweka kambi ya wiki mbili nchini Uturuki ili kuwapa nguvu wachezaji na sasa wanavuna mavuno ya kambi hiyo bora nchini humo.

“Mashabiki wa Yanga wasiwe na wasiwasi, tumejipanga sana, cha muhimu tunaongoza ligi na hakuna wa kutufikia kwa poniti zetu 49, tushikamane ili tupate mafanikio tuliotarajia”. Alisema Kizuguto.

Afisa habari huyo wa watoto wa mitaa ya Twiga na Jangwani aliongeza kuwa licha ya kuwa na uhakika wa kutwaa kombe msimu huu, wanadhamiria kufanya vizuri mechi zote zilizosalia ili kulinda heshima yao.

Kizuguto alisema mashabiki na wanachama wa klabu hiyo waendelee kushikama na kuwaombea dua wachezaji wao ili wawe na afya njema katika mchezo wao na Oljoro.

Pia amesema mpaka sasa hakuna mchezaji yeyote aliyeripotiwa kuwa majeruhi, lakini kesho watatoa taarifa baada ya kukutana na wachezaji wote mazoezini.

Jumamosi wiki iliyopita Vinara Yanga waliambulia pointi moja katika dimba la Jamhuri mkoani Morogoro baada ya kubanwa mbavu na vijana wa Rishad Adolf, maafande wa kupiga kwata, Polisi Morogoro , mchezo uliomalizika kwa suluhu pacha ya bila kufungana.