UKUMBI WA CCM MWINJUMA- MWANANYAMALA KUWAKA MOTO APRILI SABA!

Na Baraka Mpenja, Dar es Salaam

Burudani kubwa kwa wapenzi wa masumbwi inatarajiwa kufanyika aprili saba mwaka huu ukumbi wa CCM Mwinjuma , Mwananyamala jijini, Dar es salaam,  ambapo bondia Issa Omary na Shaban Madilu watapanda ulingoni katika pambano la raundi 10 kuwania  ubingwa wa UBO (Universal boxing organization International) .

Katibu mkuu wa oganizesheni ya ngumi za kulipwa Tanzania (TPBO) na mratibu mkuu wa pambano hilo, Ibrahim Kamwe `Big Light` amesema pambano hilo linatarajia kuwa la kukata na shoka kutokana na ubora wa mabondio wote wawili.

“kama unapenda masumbwi hakika ni siku nzuri kwako kuona ulingo ukihimili mikikimikiki ya mabondia ambao wamekamiana sana kutokana na upinzani wao wa muda mrefu, nawaomba watu wafike kwa wingi”. Alisema Kamwe.

Akizungumzia kiingilio cha kuona burudani hiyo,  Kamwe alisema kuwa wameamua kuweka kiingilio cha kawaida cha shilingi elfu nne (4,000/=) za kitanzania kutokana na watu wengi kutoka katika msimu wa sikuu ya pasaka.

Kamwe aliongeza kuwa siku hiyo mapambano yataanza majira ya saa kumi jioni, hivyo ni muhimu kwa wapenzi wa masumbwi ama ndonnga kuwahi kufika ukumbini ili kupata burudani maridhawa.

Mratibu huyo alisitiza kuwa siku hiyo yatakuwepo mapamabo mengi ya utangulizi kabla ya wanaume wawili watakaowania ubingwa kupanda ulingoni kuoneshana umwamba mbele ya umati wa mashabiki watakaofurika ukumbini hapo.

“Ili kuhakikisha buruadani inakuwa nzuri, tumeandaa mapambano ya utangulizi, Bondia Ramadhan Kido atapanda ulingoni na Musa Mbabe,Joseph Marwa ataoneshana ubaunsa na Amour Mzungu wakatai huo huo Mwaite Juma atatunishana msuli na Hussein Mbonde, hakika usikose siku hiyo”. Alisisitiza Kamwe.

Akizungumzia hali ya mchezo wa masumbwi nchini, Kamwe alisema mchezo huo unazidi kujipatia umaarufu , hivyo ni nafasi kwa wadau kutupia jicho la tatu na kuwekeza kama wanavyofanya kwenye mchezo wa kandanda.

Kamwe aliongeza kuwa masumbwi yanaweza kulibeba taifa medani ya kimataifa, hivyo serikali, taasisi za wtu binafsi, makampuni mbalimbali yanatakiwa kuwekeza katika mchezo huo wenye umaarufu mkubwa duniani.