MICHUANO YA KITAIFA YAHAMASISHA NETIBOLI JIJINI MBEYA WADAU WAJITOKEZA!

By Baraka Mpenja

KUFUATIA  mkoa wa Mbeya kuwa mwenyeji wa michuano  ya mpira wa pete `netiboli` ngazi ya taifa septemba mwaka jana, sasa mchezo huo unaonekana kuwa na hamasa kubwa kwa wadau hususani makampuni mbalimbali ya simu na makampuni  binafsi ya kibiashara.

Katika mashindano hayo ya kitaifa Shule inayomilikiwa na mwanariadha wa zamani wa Tanzania na rais wa kamati ya Olympic Tanazania, OT, Filbert Bayi, inayojulikana kwa jina la “Filbert Bayi School”  walitwaa ubingwa, huku Jeshi stars wakishika nafasi ya pili na JKT Mbweni  nafasi ya tatu.

Akizungumza leo na mtandao huu, mwenyekiti wa chama cha mpira wa pete jijini Mbeya, Mary Mng`ong`o amesema hali ya mchezo huo uliolala kwa muda mrefu  inatia matumaini kufuatia wadau mbalimbali kuendelea kuchangamkia mchezo huo unaopeperusha vyema bendera ya taifa la Tanzania.

“Hali imekuwa nzuri sana, kwa mfano Mei mosi itafanyika kitaifa mkoani Mbeya, kulikuwa na timu nyingi zilizoomba kushiriki, kutokana na mashindano hayo kuwa ya kitaifa na kuwa na kiingilio kikubwa tumeamua kuwa na timu chache miongoni mwa timu nyingi sana zenye nia ya kushindana siku hiyo”. Alisema Mng`ong`o.

Mwenyekiti huyo aliongeza kuwa kabla ya michuano ya kitaifa kufanyika mkoani humo, mpira wa pete ulisahaulika kabisa, lakini sasa mwamko umekuwa mkubwa kwa viongozi wa serikali, vyama na wadau wa michezo ambao kwa pamoja wanaonesha nia ya kuchangia na kudhamini mashindano ya ndani ya mkoa kwa siku za usoni.

“Unapoona watu binafsi na makampuni wanaonesha  azima ya kudhamini mpira huu, kama viongozi tunajiridhisha na majibu yetu kuwa, hamasa inazidi kuwa kubwa na tunaamini baada ya miaka michache ijayo mkoa wetu utakuwa kitovu cha wachezaji wa netiboli kitaifa”. Alisisitiza Mng`ong`o.

Akizungumzia mikakati yao kwa sasa, kiongozi huyo anayesifika kuwa mvumilivu wa changamoto za kiutendaji, alisema ni kuangalia uwezekano wa kuyafikia maeneo yote ya jiji ili kuhamasisha zaidi mchezo huo.

Mng`ong`o alisema wana mpango wa kuanzisha mpango maalumu wa kusaka vipaji na kuhamasisha mchezo huo kuanzia ngazi ya kata, Tarafa na wilaya zote ili kupata timu nzuri na kali ya mkoa itakayowakilisha mkoa michuano ya kitaifa.

“Ukiangalia maeneo mengi ya vijijini, kuna vipaji vingi vya wanamichezo,tunalijua hilo, na ndio maana tunahakikisha tunafungua njia ya kuwafikia wote ili watumie vipaji vyao kwa faida ya mkoa na taifa”. Alisisitiza Mng`ong`o.

Pia aliwataka wadau kuendelea kujitokeza kuwachangia ili wafanikishe malengo yao ya kuboresha mchezo huo.

Alisema mwaka jana wakati wa mashindano walipata shida sana kuendesha mashindano ya kitaifa kutokana na ukata mkubwa licha ya wadau kuwachangia kiasi kidogo cha fedha.

Mpaka sasa kiongozi huyo alisema wanadaiwa na watu binafsi ambao chama kiliwapigia magoti ili kufanikisha mashindano, hivyo mwaka huu wanaomba watu wajitokeze kwa wingi kuwachangia katika mashindano watakayoanzisha pamoja nay ale ya Mei Mosi.