LIGI KUU BARA LEO: LYON NA WAPIGA GWARIDE WA JKT RUVU CHAMAZI HAPATOSHI!!

Musa Hassan Mgunya "Mgosi" kulia, ataongoza safu ya ushambuliaji ya JKT Ruvu

Na Baraka Mpenja

Ligi kuu Tanzania bara inatarajiwa kuendelea leo kwa mechi moja kuchezwa katika dimba la Chamazi baina ya maafande wa JKT Ruvu  kutoka Pwani dhidi ya Africa Lyon ya jijini Dar es salaam.

Kuelekea katika mchezo huo unaowakutanisha wapambanaji wa kukwepa rungu la kushuka daraja msimu huu timu zote zimeiambia MICHEZO BOMBA! kuwa zimejipanga kuibuka kidedea katika mchezo huo wa kukata na shoka.

Katibu mkuu wa Africa Lyon Ernest Brown alisema hawana cha kupoteza zaidi ya kutafuta ushindi mbelebya wareruhiwa JKT Ruvu ambao mchezo uliopita waliambulia kipigo cha mabao 3-0 kutoka kwa vinara Yanga uwanja wa taifa jijini Dar es salaam.

“Hali yetu ni mbaya sana msimu huu, tuko hatarini kushuka daraja, mchezo wa leo tumejiandaa kushinda ili kupata pointi tatu muhimu mbele ya wapinzani wetu”. Alisema Brown.

Brown alisema msimu huu ligi imekuwa na changamoto kubwa sana kutokana na timu zote kushindana kwa nguvu kuhitaji matokeo mazuri.

Katibu huyo aliongeza kuwa mashabiki wa klabu hiyo wasife moyo kwa sababu hilo ndio soka, cha msingi na muhimu wajitokeze kuwapa sapoti leo Chamazi ili angalau wapate pointi tatu muhimu.

Kwa upande wa JKT Ruvu, kocha wake Mpya Keny Mwaisabula ambaye hayupo jijini Dar kwa majukumu ya kikazi alisema timu yake iko shwari kuwavaa Lyon ambao wanahitaji kupata ushindi wa ili kujinusuru na mkasi wa kushuka daraja kama ilivyo kwao.

Mwaisabula alisema amepewa timu siku za kiama lakini atahakikisha anashinda mechi zilizosalia ili kubakia ligi kuu msimu ujao.

“Najua wengi hawaamini kama tunaweza kusalia ligi kuu, sisi ni wapiganaji sana na tunaweza kufanya maajabu, tumejipanga vizuri.

Na hapo kesho Wekundu wa Msimbazi watakuwa kibaruani dhidi ya maafande wa Ruvu shooting katika dimba la taifa jijini Dar es salaam.

Simba wameshapoteza Ubingwa ambao kwa aslimia 99 watani zao wa jadi Dar Young Africans wapo mbioni kuunyakua kutokana na kuhitaji pointi moja tu katika michezo miwili iliyobakia.