KOCHA MBEYA CITY AYASHUKIA MAKAMPUNI ATAKA YAJIINGIZE SOKA LA VIJANA!

 

Na Baraka Mpenja 

Makampuni makubwa yanayojitokeza kudhamini timu kubwa za ligi kuu soka Tanzania bara yametupiwa lawama kwa kukimbia majukumu yao ya kuwekeza katika soka la vijana ambalo ndio msingi wa kupanda kwa kiwango cha mchezo huo  nchi yoyote duniani.

Akizungumzia na mtandao huu kutoka jijini Mbeya, kocha msaidizi wa klabu mpya ya lgi kuu msimu ujao, Mbeya city na mkurugenzi wa kituo cha kulea na kuibua vipaji cha “Forest Youth Academy”, mwalimu Maka Mwalwisye amesema makampuni yangekuwa na nia ya kuendeleza soka  yangewekeza katika soka la vijana ili kupata wachezaji makinda.

“Siku zote nyumba haiwezi kusimama bila msingi, na huwezi kuvuna mahindi bila kupanda, lazima vijana waandaliwe kwa juhudi zote, kama makampuni yatajitokeza kusaidia vitua vya soka la vijana itasaidia zaidi kusonga mbele”. Alisema kocha Mwalwisye.

Kocha huyo alitolea mfano kikosi cha sasa cha Taifa stars kilichosheheni makinda wengi ambao msingi wao wa kucheza kandanda umeanzia  soka la vijana husasani michuano ya Copa Coca Cola.

“Watu wanasahau, wakati kocha Kim Paulsen akikabidhiwa majukumu ya kukinoa kikosi cha Stars alikuwa kocha wa timu za vijana, alitumia muda mwingi kuwafundisha vijana ambao baadaye aliamaua kuwatumia timu ya taifa, sasa timu inafanya vizuri, lakini bado makampuni yanashindwa kujiingiza katika soka la vijana”. Aliongeza Mwalwisye.

Pia alisisitiza kuwa timu ya taifa imejaza makinda wanaoonesha soka safi, lakini soka linakwenda na wakati, hivyo kama jitihada za kuwekeza soka la vijana zitasahaulika, basi tutarudi wakati ule wa kuzomea Taifa stars kwani itakosa wachezaji wengine.

Kocha huyo aliongeza kuwa yeye kama mdau mkubwa wa soka na mwalimu wa mchezo huo aliamua kuanzisha kituo cha kulea na kuibua vipaji mwaka 2001 na sasa amaepata mafanikio makubwa sana kufuatia kuzalisha wachezaji wengi wanaocheza ligi kuu na ligi daraja la kwanza.

“Nimefanikiwa kuwa na kituo changu ingawa bado ninahitaji msaada mkubwa katika suala la vifaa kama mipira na chezi. Mimi ni mtaalamu na huwa nashona mwenyewe mipira pale ninaposhindwa kupata vifaa kwa wakati, hakika kuendesha kituo sio kazi nyepesi kama watu wanavyofikiria”. Alisema Mwalwisye.

Akipendekeza nini kifanyike, Mwalwisye amewataka wadau wa michezo na vyombo vya habari kufanya makongamano ya michezo ili wadau wakutane na kujadili mstakabali wa soka la vijana.

Pia alivitaka vyombo vya habari kuwaelimisha watu wenye makampuni ili wajiingize kujenga misingi ya soka la taifa kwa kuwekeza katika soka la vijana ambalo ndio kama msingi wa nyumba.

Mnamo mwaka jana Kocha Maka Mwilwisye alikiongoza kikosi cha timu ya vijana ya mkoa wa Mbeya katika michuano ya Copa Coca Cola iliyofanyika jijini Dar es Salaam, lakini alitolewa hatua ya awali ya michuano hiyo.