JULIO KILICHOBAKI NI KULINDA HESHIMA TU, WANAJANGWA WATAKIONA CHA MOTO!

KOCHA JULIO KUSHOTO, KULIA NI MSEMAJI WA KLABU HIYO EZEKIEL KAMWAGA

Na Baraka Mpenja

Kocha msaidizi wa wekundu wa msimbazi Simba “Taifa Kubwa”, Mzalendo Jamhuri Kiwhelo “Julio” amesema licha ya kupoteza ubingwa wao msimu huu na nafasi ya pili bado wanajiandaa kwa nguvu zote kulinda heshima katika michezo iliyosalia hasa mtanange wa funga dimba dhidi ya watani wao wa jadi Dar Young Africans.

Julio ameiambia MICHEZO BOMBA!  kuwa kwa sasa wanaendelea kukifua kikosi chao kilichojaa makinda wengi kwa ajili ya mchezo ujao dhidi ya maafande wa Ruvu Shooting aprili 25 uwanja wa taifa jijini Dar es salaam.

“Kwanza lazima tumshukuru mungu kwa kile tulichokipata, watani wetu kwa asilimia 99 wameshakuwa mabingwa, hata nafasi ya pili ni ngumu sana kuipata kwetu sisi, lakini tutakapokutana na Yanga kazi ni kuwafunga ili kupunguza machungu”. Alisema Julio.

Kocha huyo mwenye maneno mengi aliongeza kuwa kitendo cha kocha mkuu wa klabu hiyo Mfaransa Patrick Liewig kuwapanga zaidi vijana kuliko mafaza wa klabu hiyo hakimaanishi  hawajui kucheza, lakini mwalimu imeona hakuna tofauti yoyote kati ya vijana na wakongwe hao.

Julio alisisitiza kuwa kwa sasa wanaendelea na zoezi la kuwajenga mayoso wao wanaoonekana kukua siku hadi siku na kama wataendelea kuwa na nidhamu wanayoionesha sasa, hakika msimu ujao Simba itakuwa kali zaidi ya kawaida.

“Tumeteleza na kupoteza ubingwa, wana Simba hatuna haja ya kuvurugana, tuwe na subira, simba hii ya vijana hakika itafanya vizuri sana na kuwashangaza wengi”. Alisema Julio.

Akizungumzia hali ya wachezaji wa Simba, Julio alisema wote wapo salama na wanajiandaa na mchezo ujao kupepetana na wanajeshi wa Charles Boniface Mkwasa.

Simba ipo nafasi ya nne ikiwa na pointi 36 na mbele yao wapo Kagera Sugar wenye pointi 40 na nafasi ya pili wapo Azam fc wenye pointi 47 wakati Vinara Yanga wapo nafasi ya kwanza wakiwa na pointi 56 huku wakisubiri kupata pointi moja tu kujitangazia ubingwa msimu huu.