AZAM FC BADO WANAYO NAFASI YA KUTAFUTA MATOKEO YA USHINDI BAADA YA MECHI YA JANA TAIFA!

Na Baraka Mpenja

Siku moja baada ya klabu ya Azam fc maarufu kama lambalamba kushindwa kuwatungua wanajeshi la Morroco AS FAR Rabat katika mchezo wa kwanza wa raundi ya tatu kombe la shirikisho barani Afrika, wadau wameendelea kutoa maoni yao juu ya matokeo hayo na kusema wawakilishi hao wa Tanzania wanaweza kufanya vizuri mechi ya Marudiano wiki mbili zijazo nchini Morroco.

Wakizungumza kwa nyakati tofauti na Fullshangwe wadau hao walisema Azam inatakiwa kujiandaa sana kutokana na uzoefu unaoonesha kuwa timu nyingi za waarabu zina tabia ya kutafuta sare ama suluhu ugenini na hatimaye kumaliza kazi wakirudi kwao.

Mkurugenzi wa Ufundi wa shirikisho la soka Tanzania Sunday Bato Kayuni alisema watanzania wengi hawakutegemea matokeo ya jana ingawa ukweli ulikuwa pale pale kuwa, FAR Rabat ni timu nzuri yenye uzoefu  mkubwa wa mashindano ya Afrika kuliko Azam ambao ndio mara ya kwanza kushiriki michuano ya kimataifa.

Kayuni alisema Azam ilicheza kwa presha kubwa kwani ilikuwa inahitaji matokeo ya nyumabi ili kupata unafuu katika mchezo wa marudiano, lakini waarabu waliwahimili vizuri na kulazimisha suluhu pacha ya bila kufungana.

“Bado timu yetu ina faida ya kusonga mbele, Rabat wao watahitaji ushindi hata wa bao moja, wakati Azam wanahitaji sare ya magoli yoyote ama ushindi, na kama watapata goli moja ugenini itawagharimu wamorroco, kila kitu kinawezekana, kinachotakiwa ni mwalimu na wachezaji kujipanga vizuri na kuamini wanaweza kufanya vizuri”. Alisema Kayuni.

Kayuni aliongeza kuwa michezo ya awali Azam walionekana kutokucheza vizuri sana uwanja wa nyumbani kutokana na kuhitaji matokeo ya ushindi na kuwafurahisha mashabiki waliofurika uwanjani, lakini mechi za ugenini walipata ushindi mnono, hivyo hata Morroco wanaweza kupata ushindi mnono pia.

Kwa upande wake kocha wa zamani wa African sports ya Tanga, Mjumbe wa kamati ya ufufundi ya simba na mwalimu wa soka la vijana TFF, John William “Del Piero” alisema timu ya Rabat ni ngumu sana na wana ujanja mwingi wa kulazimisha matokeo wanayoyahitaji.

Piero alisema timu ambazo Azam ilikutana nazo awali hazikuwa ngumu kama timu ya jana, hivyo kinachotakiwa kwa wachezaji ni kujitambua kuwa nini wanataka kufanya pamoja na kusikiliza maoni ya kocha wao sanjari na walimu waliobobea katika mchezo wa soka.

“Azam ina wachezaji wazuri na mwalimu mzuri, endapo watajipanga barabara wanaweza kusonga mbele, lakini wajiandae kwa hujumu zozote zile kwa sababau waarabu wanapokuwa ugenini wanapenda kufanyia haki lakini wakiwa kwao wana mambo ya kipuuzi sana”. Alisema Piero.

Naye katibu mkuu wa zamani wa shirikisho la soka Tanzania, Fredrick Mwakalebela alishauri Azam kukaa chini na kuangalia wapi waliteleza katika mchezo wa nyuambi kwani waarabu tabia yao ni kumaliza mchezo wakiwa kwao.

Mwakalebela aliongeza kuwa katika mchezo wa jana wawakilishi hao wa Tanzania katika michuano ya kimataifa walicheza vizuri na kupoteza nafasi muhimu kufunga, lakini hilo ndio soka labda bahati yao itakuwa Morroco.

“Kipre Tchetche alipiga shuti kali dakika ya mwisho lakini liligomba mtamabaa panya, hakika lilikuwa bao kwa Azam, mimi nafikiri ushinid katika mchezo wa jana ungepatikana endapo wangetulia dakika za mwanzo”. Alisema Mwakalebela.

Katibu huyo wa zamani wa TFF aliwatakaka Azam na watanzania kwa ujumla hususani waliopo kule Morroco ingawa sio wengi kuwapa sapoti kubwa matajiri hao wa Tanzania ili wakienda huko wapate motisha ya kucheza vizuri na kuvumilia hujuma za waarabu ambao ni kawaida yao.