WEKUNDU WA MSIMBAZI NA SHINYANGA UNITED HAKUNA MBABE KAMBARAGE!

VIJANA WA SIMBA

Na Baraka Mpenja

Mabingwa watetezi wa ligi kuu soka Tanzania bara, wekundu wa Msimbazi Simba “Taifa Kubwa” baada ya jana kukabwa koo kwa kutoa sare ya 2-2 na vijana wa mitaa ya Kishamapanda jijini Mwanza, Toto Afrika,uwanja wa CCM-Kirumba, leo wameshuka dimbani mkoani Shinyanga kumenyana na Shinyanga United mechi ya kirafiki.

Dakika tisini za mchezo huo wenye lengo la kuwapa uzoefu zaidi makinda wake ambao Simba inawatumia kwa mechi zilizosalia kipute cha ligi kuu  ilimalizika kwa sare ya 1-1 katika uwanja wa Kambarage mjini Shinyanga huku bao la Simba likifungwa Ramadhani Kipalamoto.

Simba wapo katika safari ya kusuka upya  kikosi chake ambacho kimesheeni vijana na kuwatupa wakongwe kadhaa “Mafaza” kwa sababu ya kukosa nidhamu katika kazi yao inayowapa kipato.

Miongoni mwa wachezaji waliotemwa ni kiungo Haruna Moshi `Boban`,  Ramadhan Chombo `Redondo`, Mwinyi kazimoto Mitula, washambuliaji ni Abdallah Juma na Mzambia Ferlix Mumba Sunzu;  mabeki Juma Said Nyosso,  Amir Maftah, Komabil Keita, na Paul Ngalema.

Kabla ya kwenda Mwanza kucheza na toto, Simba alitokea Kaitaba kucheza na Kagera sugar huku ikiwa imepita mkoa ya Singida na kucheza mchezo wa kirafiki dhidi ya Singida united huku ikishinda 4-0 na baadaye ilisafiri mpaka mkoani Tabora kupigishana madaluga na maafande wa Rhino Rangers waliokata tiketi ya kushiriki kipute cha ligi kuu bara msimu ujao, mchezo  uliomalizika kwa sare ya 1-1.

Kwa mjibu wa Afisa habari wa klabu hiyo Ezekiel Kamwaga maarufu kwa jina la Mr. Liverpool amekaririwa akisema sasa ni wakati wa mashabiki na wanachama wa klabu hiyo kutulia kwani benchi la ufundi likiongozwa na kocha Mfaransa Patrick Liewig, linafumua kikosi na kuunda timu mpya ya ushindani msimu ujao.

Kamwaga amesema katika mchezo wa leo mkaoni Shinyanga vijana wameonekana kuimarika sana huku wakicheza kwa kujiamini kama jana walivyofanya CCM kirumba licha ya kuambulia sare.

Simba ambao ni mabinwa watetezi wa taji, wanaonekana kuweka rehani ubingwa wao na kuziachia klabu za Azam fc yenye pointi 43 na Vianara Yanga wenye pointi 49 kuchuana vikali kuwania mwari wa ligi kuu msimu huu.

Matokeo ya jana dhidi ya Toto, yamemfanya Mnyama pori, Simba ashuke  hadi nafasi ya nne kwenye msimamo wa Ligi Kuu kwa pointi zake 35 baada ya kucheza mechi 21, nyuma ya Kagera Sugar yenye pointi 37.