TETESI: ARSENAL NA MTU 3 TOKA BARCA, JITU LA FUTI 6 NCHI 4 OLD TRAFFORD!

ZIPO HABARI nzito kuwa  Arsenal inataka kuchota Mtu 3 za Barcelona huku Manchester United ikiripotiwa ipo njiani kukamilisha Usajili wa Beki mwenye Urefu wa Futi 6 Inchi 4.

ARSENAL NA MTU 3 ZA BARCA

LEO huko Jijini London zimezagaa ripoti kuwa Arsenal wako njiani kuwachukua Wachezaji wa Barcelonal, Alexis Sanchez, David Villa na Victor Valdes.

Bosi wa Arsene Wenger yupo kwenye presha kubwa ya kuleta mabadiliko hasa ikiwa dhahiri Msimu huu watamaliza Miaka 9 bila ya Taji lolote lile.

Na ili kubadili hali hii Uongozi wa Arsenal tayari umemuahidi Wenger kitita kikubwa ili kusuka upya Kikosi chake na safari hii anatarajiwa kuacha ile Falsafa yake ya kununua Chipukizi na badala yake kununua Majina makubwa yenye uzoefu ili kuhakikisha Msimu ujao Makombe yanatua Emirates.

Ripoti toka huko Spain zimedokeza Arsenal ndio wana nafasi kubwa kuwanasa Wachezaji hao wa Barcelona ambao wataondoka Nou Camp mwishoni mwa Msimu huu.

Tayari Kipa Valdes ashaweka wazi anahama mwishoni mwa Msimu na pia Villa ambae anaingia Mwaka wake wa mwisho wa Mkataba wake na hivyo Barca kulazimika kumuuza sasa ili kuambua Fedha badala ya kumruhusu aondoke Mchezaji huru Msimu ujao.

Sanchez yeye amewekwa kwenye Listi ya kuhamishwa kwa sababu tu kiwango kimeshuka na Msimu huu amefunga Bao 5 tu.

FERGIE KUMNASA GARAY

Manchester United wameripotiwa kuwa wako mbioni kumnasa Beki wa Argentina na Klabu ya Ureno Benfica aitwae Ezequiel Garay ambae ni Jitu la Urefu wa Futi 6 Inchi 4.

Kwa muda mrefu sasa Bosi wa Man United, Sir Alex Ferguson, amekuwa akifuatilia nyendo za Garay, mwenye Miaka 26, huku Msaka Vipaji wa Man United, Martins, ambae ni Ndugu wa Sir Alex Ferguson, akihudhuria Mechi kadhaa za Benfica huko Ureno.

Hivi sasa Man United wameripotiwa kuharakisha Dili ya kumnasa Garay hasa kwa vile Chelsea wametumbukia kumwania Beki huyo ambae anathaminiwa kugharimu si chini ya Pauni Milioni 17.

Umuhimu wa kumnasa Garay kwa Man United unakuja hasa kwa vile nguzo zao kubwa kwenye Difensi, Rio Ferdinand na Nemanja Vidic, wanakumbwa na maumivu ya mara kwa mara na umri pia umeanza kuwatupa mkono.

Msimu huu, Garay ameng’ara sana na Benfica na pia Timu ya Taifa ya Argentina ambayo hapo jana alikuwa nguzo imara Argentina walipoinyuka Venezuela Bao 3-0 na kujichimbia kileleni mwa Kanda ya Nchi za Marekani ya Kusini zinazowania kucheza Fainali za Kombe la Dunia huko Brazil Mwaka 2014.

Garay alianza kupata umaarufu akiwa na Klabu ya Spain Racing Santander ambako alijiunga akitokea kwao Argentina akiwa mdogo tu toka Klabu ya huko Newell’s Old Boys na Mwaka 2008 Real Madrid ikamsaini na baadae Julai 2011 kuhamia Benfica.

Wataalam waliowahi kumchunguza Garay wanahisi kuwa Sentahafu huyo anafaa sana kwa mikikimikiki ya England kwa vile ni mwepesi na mwenye nguvu.