MPENJA SPORTS

>>MSIMU HUU MAMENEJA 33 WAMEMWAGA UNGA ENGLAND!!

>>JUMLA MAMENEJA NA MAKOCHA 103 WAMEPOTEZA KAZI!!

BOSI wa Chama cha Mameneja wa Ligi, LMA [League Managers' Association] huko England, Richard Bevan, ameelezea wimbi la kutimua Mameneja wa Vilabu vya Soka ni fedheha.

Akiongea mara tu baada ya Blackburn Rovers kumtimua Meneja wao Michael Appleton hapo Jumanne baada ya kudumu kwenye wadhifa wake kwa Mechi 15 tu ndani ya Siku 67, Bevan alitamka: “Hii inafedhesha Gemu yetu kwa kuwatimua kwa uonevu tu. Hii hali ya kuishi kwa kukosa amani kazini kunahatarisha taaluma ya Umeneja wa Soka!”

Mara baada ya Blackburn kumtimua Appleton, Klabu ya Ligi 1, Stevenage, ilifuatia na kumfukuza Gary Smith na huyo akawa Meneja wa 33 kutimuliwa kazi kwa Msimu huu wa 2012/13.

++++++++++++++++++++++++++++

2012-13: MAMENEJA WALIOTIMULIWA

-Barclays Premier League: 4

-Championship: 17

-Ligi 1: 15

-Ligi 2: 11

++++++++++++++++++++++++++++

Bevan alinung’unika: “Hao ni zaidi ya Watu 100 kupoteza ajira, Mameneja 100, Familia 100 hizo! Hata sijui kiburi hiki kwenye Soka kimetoka wapi ukilinganisha na Sehemu nyingine za kazi!”

Msimu huu kwenye Barclays Premier League, Mameneja waliofukuzwa wa 4 ambao ni Roberto Di Matteo wa Chelsea, Brian McDermott wa Reading, Nigel Adkins wa Southampton na Mark Hughes wa QPR.

Na huko kwenye Ligi za Madaraja ya chini ndio balaa kubwa kwani kwenye Championship Mameneja 17 wamekwenda na maji na Ligi 1 na 2 zimetimua jumla ya Mameneja 26.

Huko Nottingham Forest, tangu Julai Mwaka jana washakuwa na Mameneja wa tatu sawa na Blackpool ambao Mwezi uliopita walimteua Nguli Paul Ince kuwa Meneja wao wa tatu Msimu huu.

Na kutimuliwa kwa Appleton kumeifanya Blackburn iwe imeshawaondoa Mameneja wa tatu kufuatia Steve Kean hapo Septemba na Henning Berg Mwezi Desemba.

 

BABA AMJIA JUU WENGER KUMGEUZA MWANAE MBUZI WA KAFARA!!

Jumatano, 20 Machi 2013 17:27

>>FERGIE, NANI, KULIVAA RUNGU LA UEFA KESHO??

>>YAYA ‘MWENYE HUZUNI’, KUTIMKA???

WAKATI Meneja wa Arsenal, Arsene Wenger, akipewa vipande vyake na Baba wa Mchezaji wake mmoja, UEFA kesho itatangaza hukumu yao kuhusu Kesi za Meneja wa Manchester United, Sir Alex Ferguson, na Mchezaji wake, Nani, huku huko Man City zipo taarifa Mchezaji wao Yaya Toure anataka kuihama Klabu hiyo.

BABA WA WOJCIECH SZCZESNY AHOJI KUTEMWA MWANAE!!

Arsène Wenger ametakiwa awajibike kwa kuporomoka kiwango kwa Kipa wake Wojciech Szczesny badala ya kumgeuza ‘Mbuzi wa Kafara’ kama alivyodai Maciej Szczesny, ambae ni Mchezaji wa zamani wa Kimataifa wa Poland na pia Baba Mzazi wa Kipa huyo wa Arsenal.

Szczesny, Miaka 22, alitemwa kwenye Mechi ya Arsenal na Bayern Munich Wiki iliyopita ya UCL, UEFA CHAMPONZ LIGI, na Wenger kudai Kipa huyo alipumzishwa baada ya kucheza Mechi nyingi zilizomuathiri Kisaikolojia.

Lakini pia Kipa huyo wa Kimataifa wa Poland alipigwa Benchi kwenye Mechi iliyofuatia ya Ligi Arsenal walipoifunga Swansea City na Lukasz Fabianski kukaa Golini kwa mara ya pili mfululizo na kutoruhusu Bao hata moja kwa Mechi yake ya pili.

Akiongea na Gazeti kubwa la Michezo huko Poland, Przeglad Sportowy, Baba Mzazi wa Kipa huyo, Maciej Szczesny, ambae aliichezea Poland mara 7 na kuiwezesha Klabu ya Legia Warsaw kufika Robo Fainali ya UCL Msimu wa Mwaka 1995/6, amemtuhumu Wenger kwa kumtelekeza Mwanawe badala ya kumtunza.

Mzee Szczesny ametamka: "Wenger tayari ametafuta Mbuzi wa Kafara. Bosi hatakiwi kuwa hivi. Wojciech aliumia vibaya Mwezi Aprili na Mei Mwaka jana na Wenger akamlazimisha kucheza. Wenger alikuwa akiidharau afya ya Wojciech.”

Hata hivyo Mzee Szczesny anaamini Mwanawe atakuwa Kipa Nambari Wani wa Arsenal kwa muda mrefu Klabu ambayo ilimlea tangu utoto ilipomchukua Mwaka 2006 toka Klabu ya Nyumbani kwao Legia Warsaw na kumwingiza Chuo cha Soka cha Arsenal.

FERGUSON NA NANI KUJUA HATMA YAO UEFA ALHAMISI

UEFA kesho Alhamisi inatarajiwa kutangaza Hukumu ya Kesi dhidi ya Meneja wa Manchester United, Sir Alex Ferguson, na Winga wake Nani kutokana na matukio yaliyotokea mapema Mwezi huu Man United ilipofungwa 2-1 na Real Madrid na kutupwa nje ya UCL, UEFA CHAMPONZ LIGI.

Ferguson ameshitakiwa kwa kutohudhuria Mahojiano na Wanahabari mara baada ya Mechi hiyo kama inavyotakiwa na UEFA na Nani alitolewa kwa Kadi Nyekundu kwa kucheza Rafu na sasa anasubiri kujua kama Adhabu yake itabaki Kifungo cha Mechi moja tu kinachotolewa moja kwa moja au kama ataongezewa Adhabu.

Kuhusu Kosa la Ferguson Adhabu inayoweza kutolewa ni Onyo tu, Faini au kufungiwa Mechi moja au zaidi lakini inaaminika kuwa Rekodi ya Ferguson ya kusimamia zaidi ya Mechi 200 za UCL na kutokosa hata mara moja Mahojiano na Wanahabari huenda kukamnusuru na kukwepa Kifungo.

YAYA KUTIMKA MAN CITY??

KIUNGO wa Mabingwa watetezi wa England Manchester City, YayaToure, huenda akaihama Klabu hiyo kufuatia kukasirishwa kwake kuhusu majadiliano ya Mkataba wake mpya yanavyokwenda.

Toure ambae ndie alikuwa nguzo kubwa ya Man City kutwaa Ubingwa Msimu uliopita inasemekana anawindwa na Klabu kadhaa kubwa Barani Ulaya.

Kwa mujibu wa Wakala wa Toure, ikiwa hamna maafikiano yeyote yatafikiwa kuhusu Mkataba mpya ifikapo Jumamosi hii basi yeye na Mteja wake wataanza mazungumzo na Klabu nyingine.

Wakala wa Toure, Dimitri Seluk, ametoboa kuwa mazungumzo ya Mkataba mpya yamekwama kwa Miezi 6 sasa.

Inadaiwa Toure anaamini, mbali ya Kocha Roberto Mancini, hathaminiwa Klabuni hapo.

Inaaminika Toure anapata Mshahara wa Pauni 220,000 kwa Wiki ukiwa ni mmoja wa Mishahara mikubwa katika Ulimwengu wa Soka lakini pia inaaminika katika mazungumzo ya sasa kuhusu Mkataba mpya hakuna suala la nyongeza ya Mshahara.